Agellus

From Asegzawal n Tutlayt Tamaziɣt

Agellus (igellusen), [1] axe (fr) – axis (en) - محور

Addad amaruz: ugellus (yigellusen).


Tiḍniwin n Ugellus (Takussna):

Tiḍniwin n Ugellus (yellan ttwassnent daɣ s yisem n "Agellus n Ṛuma-Berlin" akked "Agellus n Ṛuma-Berlin-Tokyo") d tamsisit n tmura i d-yebdan Amgaru Anmaḍal Wis Sin yernu nnuɣent mgal Yimsisan. Timura tigejdanin yellan deg temsisit-a d Lalman tanazit, Tagelda n Ṭṭalyan akked Umenkud n Japun. Tiḍniwin n Ugellus llant ddukklent deg tedgiwin-nsent n uyeffus imiɣef d umcengu-nsent d Yimsisan ula ma tisnaktiwin-nsent ur ddukklent ara yernu asemyuddes gar-asent ur yelli ara igerrez am win yellan gar Yimsisan.

Agellus ilul-d seg wussisen idiplumatiyen i d-yellan gar Lalman, Ṭṭalyan d Japun akken ad myallent deg wayen yerzan iswiyen-nsent imeẓrarnayen deg tlemmast n yiseggasen n 1930. Asurif amezwaru deg uslali n Ugellus d aneggaf i tezmel Lalman d Ṭṭalyan deg Tubeṛ n 1936. Deffir uzmal n uneggaf-a, Mussolini yenna-d dakken akk timura n Tuṛuft ad uɣalent ttcawaṛent "Agellus n Ṛuma-Berlin" yernu s waya i d-ilul wawal-a n "Agellus". Deg Wamber n useggas-nni, tezmel Lalman Arkawal Mgal Comintern akked Japun. Wa d amyeḍwel i zemlent snat-a n tmura akken ad nnaɣent mgal tesdukla. Ṭṭalyan tezmel arkawal-a deg 1937, sakkin rnant-d Majaṛ d Spenyul deg 1939. "Agellus n Ṛuma-Berlin" yuɣal d tamsisit deg 1939 s yisem n "Urkawal n Unfed". Deg 1940, Lalman, Ṭṭalyan d Japun zemlent "Arkawal Akerdidis", d win ideg snummdent iswiyen-nsent iredsanen. Arkawal-a rnant zemlent-t kra n tmura niḍen deg yiseggasen i d-iḍefren. D wi akk i d irkawalen i yuɣalen d tirselt i temsisit n Ugellus.

Tiḍniwin n Ugellus nebẓent aṭas n tmura yernu, deg 1942, ssawḍent ad baḍent iḥricen d imeqqranen seg Tuṛuft, Tafriqt n Ugafa d Asya Tagmuḍant s uwdag, arruz d uzeddi n yiwanaken imsillal. Tiḍniwin n Ugellus ur llint ara ttgent tiqacucin gar-asent yernu asemyuddes gar-asent yella drus maḍi. Nnig waya, tikkal, ula d iswiyen-nsent llan mgerraden. Agellus yeɣli asmi i t-rnan Yimsisan deg 1945.



© Asegzawal n Tmaziɣt - Omar MOUFFOK