Agraw

From Asegzawal n Tutlayt Tamaziɣt
Revision as of 07:56, 15 May 2024 by Amastan (talk | contribs)
(diff) ← Older revision | Latest revision (diff) | Newer revision → (diff)

Agraw (igrawen), [1] assemblée (fr) – assembly (en) - مجلس

Addad amaruz: ugraw (yigrawen).

Urḍil: tajmaɛt (tijmuyaɛ).

Agraw aɣerfan - assemblée populaire (fr) – people’s assembly (en) – مجلس شعبي

Agraw n uskasi d umciweṛ - assemblée de débat et de consultation, madjlis dikr (fr) – debate and consultation meeting (en) – مجلس ذكر



Agraw Amatu n Yiɣlanen Yeddukklen (Takussna): Sɣur Omar MOUFFOK

Agraw Amatu n Yiɣlanen Yeddukklen d yiwen seg sḍis (6) n yigmanen igejdanen n Tuddsa n Yiɣlanen Yeddukklen yernu d netta i d agman-nnes agejdan n umciweṛ, amsal n tsertyin d ugenses. Iduba, asisger, tiwuriwin d tsekkirin n Ugraw Amatu ttwabedren-d akk deg Yiɣef Wis IV n Tnattamt n Yiɣlanen Yeddukklen. Agraw Amatu d netta i d amasay ɣef umarud n Yiɣlanen Yeddukklen. D netta daɣ i d-yessummuden imaslaḍen irmezgiyen n Useqqamu n Tɣellist, yessummud-d awnetlay amatu n Yiɣlanen Yeddukklen, yettaṭṭaf-d imla i d-smutugen yiḥricen niḍen n Unagraw n Yiɣlanen Yeddukklen yernu itteg-d tineɣtusin ideg d-yettafk isemtar. Agraw Amatu itteg-d daɣ igmanen ara t-yallen deg twuriwin-nnes. D Agraw Amatu n Yiɣlanen Yeddukklen i d agman ayiwnan n tuddsa-a ideg akk iwanaken imaslaḍen lan tagadda deg ugenses d udɣar.

Agraw Amatu itteg timliliyin ddaw tselwit n uselway-nnes, am wakken i itteg tiɣemlilin yal aseggas ddaw tselwit n uwnetlay amatu n Yiɣlanen Yeddukklen. Agraw Amatu yettemlili deg Waṣuk n Ugraw Amatu, deg tesɣimt n Yiɣlanen Yeddukklen, deg temdint n New York. Timlilit taseggasant n Ugraw Amatu n Yiɣlanen Yeddukklen tbeddu-d seg Ctembeṛ yernu tettkemmil arma d Yennayer. Ur tettfaka ara arma ifuk uskasi ɣef wakk timsal i d-smutgen. S umata, askasi yettfaka uqbel ad d-tebdu tɣemlilt n useggas niḍen (deg wayyur n Ctembeṛ n useggas amaynu). Agraw Amatu yezmer daɣ ad yeg tiɣemlilin tuzzigin deg tegnatin tutribin. Taɣemlilt tamezwarut n Ugraw Amatu tella-d ass n 10 Yennayer 1946 deg Tzeqqa Talemmast Tameẓrarrayt n London yernu derwen deg-s yigensasen n 51 n tmura i d-yesreslen Tuddsa n Yiɣlanen Yeddukklen.

Amur ameqqran deg temsalt ferrunt deg Ugraw Amatu s udɣar n tegti taḥerfit. Yal tamurt tamaslaḍt tla taɣect-nnes. Imaslaḍen n Ugraw Amatu deɣɣren ɣef kra n temsalt tixatarin am talwit d tɣellist, timsal n umarud, afran, asidef, asigel d tuẓẓɛa n yimaslaḍen. Aṭas seg tneɣtusin n Ugraw Amatu, akken ad kkent, yessefk ad deɣren fell-asent sin n yimuren ɣef kraḍ seg yimaslaḍen ihan deg temlilit n Ugraw Amatu. Asnas n tneɣtusin n Ugraw Amatu ur yelli ara d uḥtim, ala deg wayen yerzan tineɣtusin n umarud. Tineɣtusin n Ugraw Amatu ttilin deg-sent yisemtar. Tineɣtusin yerzan talwit d tɣellist d Aseqqamu n Tɣellist i ideɣɣren fell-asent yernu d netta i yesseḥbibiren ɣef usnas-nsent.

Deg yiseggasen n 1980, yuɣal Ugraw Amatu d anmager n "udiwenni gar Ugafa d Unẓul", gar tmura yemgurin d tmura yettnegmun deg wayen yerzan aṭas n temsal tigraɣlanin. Timsal-a yella-d fell-asent uskasi imi i yerna umḍan n tmura timaslaḍin n Yiɣlanen Yeddukklen. Deg 1945, Tuddsa n Yiɣlanen Yeddukklen llan deg-s 51 n yimaslaḍen. Deg tezwara n teswatut tis 21, yerna umḍan-a s qrib kuẓet (4) n tikkal yernu yewweḍ ɣer 193 n tmura. Sin n yimuren ɣef kraḍ seg-sent d timura yettnegmun. Ɣef lǧal n umḍan-a, timura yettnegmun ssawaḍent ad d-ḥettment tasmektayt n Ugraw Amatu n Yiɣlanen Yeddukklen s useqdec n tegrawin n usemyuddes am tegrawt n G77. Aṭas n tmura yettnegmun i yessawaḍen ad d-sbanent tuɣact-nsent deg Yiɣlanen Yeddukklen.

Ula ma tineɣtusin n Ugraw Amatu ur llint ara d tuḥtimin, taneɣtust n Ugraw Amatu n "Tadukli i Talwit" i yettwasmemmin deg Wamber n 1950 (Taneɣtus 377 (V)) tefka azref i Ugraw Amatu akken ad yeddem tigawt mer Aseqqamu n Tɣellist ur yessawaḍ ara ad tt-yeddem. S waya, mer ad tili tuggza i talwit yernu Aseqqamu n Tɣellist ad yekref deg tuddma n uɣtas d amellil, Agraw Amatu yezmer ad yeddem aɣtas beṛṛa i Useqqamu n Tɣellist.



© Asegzawal n Tmaziɣt - Omar MOUFFOK