Akrar

From Asegzawal n Tutlayt Tamaziɣt

Akrar (akraren), mouton (fr) – sheep (en) - كبش

Addad amaruz: ukrar (yikraren).

Tasenfelt: ikerri (akraren) [33].

Urḍil: axerfi (ixerfiyen) [33].


Akrar (Takussna): Sɣur Omar MOUFFOK

Akrar (isem ussnan: Ovis ariers) d aɣersiw amelsifeẓ i kessen yimdanen d lmal. Akrar d aɣersiw asuṭaḍ abalagḍad. Llan azal n umelyaṛ n wakraren iwaddaren deg umaḍal. Taktemt n ukrar isem-nnes "tiɣsi". Akrar ameẓẓyan ttinin-as "izimer". Tagrawt n wakraren d "taqḍiɛt". Taḍuft d-yettwakksen ukrar d "ilis".

Akrar awaddar ad yili yuder-d seg wudad n Tuṛuft d Asya yernu yella ccekk d ameqqran dakken deg Iṛan i t-ksan i tikkelt tamezwarut deg umezruy. Akrar d yiwen seg yiɣersiwen imezwura akk i yeksa umdan. Imdanen kessen akraren akken ad d-kksen seg-s taḍuft, aksum d ukeffay. Taḍuft n ukrar d nettat i d isireg aɣersiwan i yettwasseqdacen aṭas akk deg umaḍal. Tukksa n taḍuft i ukrar ttinin-as "tullsa".

Akraren d aɣbalu ameqqran n taḍuft d uksum deg umaḍal. Yella daɣ mani i kessen tiɣsiwin ɣef ukeffay-nsent. Sseqdacen daɣ akraren i termitin tussnanin.

Takessawt n wakraren tella deg umur ameqqran deg temnaḍin n umaḍal yernu turar tamlilt d tameqqrant deg mennaw n tɣermiwin. Ass-a, Ustṛalya, Ziland Tamaynut, timura n tlemmast n Temrikt n Unẓul akked Briṭanya Tameqqrant d kra seg temnaḍin i yettwassnen s tkessawt n wakraren.

Akraren ṭṭfen adeg d axatar deg tkerrazt yernu lan daɣ adeg d ameqqran deg yidles n yiɣerfan i ten-ikessen. Akrar ila daɣ adeg d axatar ama deg yisɣanen ibṛahimiyen (lislam, tamasiḥit, tudayt), ama deg tesnumigin n yidelsan yemgerraden. Deg mennaw n yisɣanen d yidelsan, akrar d aɣersiw n tɣersawt.


© Asegzawal n Tmaziɣt - Dictionnaire de tamazight - Tamazight Dictionary - قاموس الأمازيغية - Omar MOUFFOK