Anmaḍal

From Asegzawal n Tutlayt Tamaziɣt

Anmaḍal (inmaḍalen), [47] mondial (fr) – global (adj.) - عالمي

Addad amaruz: unmaḍal (yinmaḍalen).


Tawacult:

Amaḍal (imaḍalen), [1] monde (fr) – world (en) - عالم

Anmaḍal (inmaḍalen), [2] mondial (fr) – global (adj.) - عالمي

Asmaḍel (ismaḍlen), [2] mondialisation (fr) – globalization (en) - عولمة

Smaḍel, [2] mondialiser (fr) – to globalize (en) - عولمَ


Amgaru Anmaḍal Wis Sin (Takussna):

Amgaru Anmaḍal Wis Sin d amyenkaf anmaḍal i yeqqimen seg 1939 ɣer 1945. Amur ameqqran seg tmura n umaḍal, gar-asent akk tiḍniwin timeqqranin, nnuɣent deg umgaru-a deg snat n temsisiyin timeqqranin: timura n Yimsisan d tmura n Ugellus (Lalman, Ṭṭalyan, Japun s umata). Aṭas seg tmura i iderwen deg umgaru-a sqedcent akk tizemmar-nsent tidamsanin, timguranin d tussnanin akken ad nnaɣent amgaru d aɣrudan, d win ideg derwen ama d iɣarimen, ama d iredsanen. Tamsafga turar tamlilt d taqerḍalt deg umgaru-a imi mennaw n tmura i yesqedcen isafagen akken ad sberrwent timdinin. Iwanaken Yeddukklen sqedcen isafagen akken ad zellin tileffuɣin tiɣwawanin ɣef Japun yernu d tin i d tikkelt tayiwnant ideg ttwasqedcen yimrigen iɣwawanen mgal yimdanen. Amgaru Anmaḍal Wis Sin d netta i d amyenkaf i yenɣan aṭas akk n medden deg umezruy imi i mmuten deg-s gar 70 d 85 n yimelyunen n yimdanen. D imelyunen i yemmuten deg tenɣaɣerfin i d-yellan deg umgaru-a am Uhulukust, am wakken i mmuten yimelyunen seg laẓ, tidalusin d waṭṭan. Asmi i xeṣrent tmura n Ugellus amgaru, Imsisan wedgen Lalman, Tutrict d Japun yernu gan-d tinefra akken ad ssirḍen imḍebbren n Lalman d Japun ɣef tejrimin i gan deg umgaru.

Ar ass-a isul yettili-d uskasi ɣef tmentilin n umgaru-a. Gar yimgiyen i iderwen deg unkar n Umgaru Anmaḍal Wis Sin d alluy n yifaciyen ɣer udabu deg kra n tmura n Tuṛuft. Daɣ, Amgaru Aɣarim n Spenyul, Amgaru Acinwat-Ajapuni d Umgaru Asuvyati-Ajapuni i d-inekren akk deffir Umgaru Anmaḍal Amezwaru uraren akk tamlilt deg waya. Amgaru Anmaḍal Wis Sin yebda-d ass n 1 Ctembeṛ 1989, mi tenbeẓ Lalman tanazit (ddaw tmehla n Adolf Hitler) tamurt n Pulunya. D aya i yeǧǧan Tagelda Yeddukklen d Fṛansa ad d-sgurint amgaru ɣef Lalman ass n 3 Ctembeṛ. Deg ukatar n Urkawal n Molotov-Ribbentrop i yettwazemlen deg Ɣuct 1939, Lalman d Tdukli Tasuvyatit msegzant akken ad bḍunt Pulunya. Gar 1939 d 1941, Lalman tenbeẓ niɣ tbaḍ amur ameqqran seg tmura n Tuṛuft yernu tga-d tamsisa yettwassnen s yisem n "Ugellus" akked Ṭṭalyan, Japun d kra n tmura niḍen. Iɣallen n Ugellus gan tiseflawin deg Tefriqt n Ugafa d Tefriqt Tagmuḍant, sseɣlin Fṛansa deg 1940. Amgaru ikemmel s umennuɣ d ameqqran gar Lalman d Tgelda Yeddukklen, am wakken i ikemmel deg tmura n Belqan. Tamsafga talmanit tella tesberraw Tagelda Yeddukklen am wakken i tella tredsa talmanit tettḥakaṛ iɣerruba ibriṭaniyen deg Ugaraw Aṭlasi. Deg Yunyu n 1941, Lalman tenbeẓ Tadukli Tasuvyatit yernu terẓem, s waya, Tirni Tagmuḍant yuɣalen d anrar ameqqran akk n yimenɣi akalan deg umezruy.

Japun, seg yidis-nnes, twet akken ad teɣmer Asya Tagmuḍant d Ugaraw Amelwi. Amgaru-nnes d Ccinwa yella yebda-d yakan deg 1937. Deg Dujembeṛ n 1941, Japun tenṭeg igelluyen imarikaniyen d yibriṭaniyen ɣef tikkelt deg Asya n Unẓul-Agmuḍan d Ugaraw Amelwi yernu yiwen seg yigelluyen iɣef tenṭeg d Pearl Harbor deg tegzirin n Hawaii. D aya i yeǧǧan Iwanaken Yeddukklen d Tgelda Yeddukklen ad d-sgurint amgaru mgal Japun. Ilmend n temsetlelt d Japun, timura n Ugellus n Tuṛuft (Lalman d Ṭṭalyan s umata) sgurint-d amgaru mgal Yiwanaken Yeddukklen. Japun dindin tenbeẓ amur ameqqran seg tegzirin n utaram n Ugaraw Amelwi maca ssawḍen Yiwanaken Yeddukklen ad tt-sbedden deg 1942 deg Tmiwta n Midway. Seg yidis niḍen, Ṭṭalyan d Lalman ttwarnant deg Tefriqt n Ugafa yernu Lalman terna-tt Tdukli Tasuvyatit deg Tmiwta n Stalingrad. Deg 1943 terna texṣer Lalman ugar n tmiwtiwin timeqqranin deg Terni Tagmuḍant. Daɣ, deg useggas-nni, iɣallen n Yimsisan nebẓen tigzirt taṭalyanit n Siqilya, am wakken rebḥen yiɣallen imarikaniyen aṭas n tmiwtiwin mgal Japun deg Ugaraw Amelwi. D aya i iḥettmen iɣallen n Ugellus ad nezɣen iman-nsen deg wakk tirniwin n yimenɣi. Deg 1944, Imsisan nebẓen Fṛansa yellan ddaw uwdag almani, deg wakud ideg Tadukli Tasuvyatit terra-d akal i as-tekkes Lalman yernu tdemmer iɣallen almaniyen ɣer utaram. Deg 1944-1945, Japun texṣer aṭas n wakal deg Asya. Iɣallen n Yimsisan skerfen tagriwa tajapunit yernu ssuffɣen Ijapuniyen seg tegzirin tigejdanin n Ugaraw Amelwi. Imsisan ssawḍen ad ssuffɣen Lalman seg yigelluyen i tewdeg deg Tuṛuft, sakkin, nebẓen tamurt n Lalman s timmad-nnes. D iɣallen isuvyatiyen i d imezwura i yewwḍen ɣer tmaneɣt talmanit n Berlin yernu d aya i yessawḍen Hitler ad ineɣ iman-nnes. Lalman tekna ass n 8 Mayu 1945. Japun tugi ad teknu s uqbal n tewtilin n Tesguri n Potsdam. Ɣef waya, Iwanaken Yeddukklen wten tamdint tajapunit n Hiroshima s tleffuɣt tabelkimant ass n 6 Ɣuct 1945, sakkin, kraḍ n wussan deffer waya, deg 9 Ɣuct, rnan wten tamdint n Nagasaki s tleffuɣt tabelkimant niḍen. D aya i yeǧǧan Japun ad taggad mer tt-nebẓen Yiwanaken Yeddukklen yernu ad rnun ad tt-wten s tleffuɣin tibelkimanin. Nnig waya, tuggad daɣ imi ussan-nni kan, Tadukli Tasuvyatit tesguri-d amgaru mgal-nnes. Ɣef waya, tessenfali-d, ass n 10 Ɣuct, tabukt-nnes akken ad teknu yernu tezmel, ass n 2 Ctembeṛ 1945, taftart-nnes n ukennu.

Amgaru Anmaḍal Wis Sin yessenfel tamṣukt n umaḍal akken ma yella yernu d netta i yessersen tirselt i umyersi agraɣlan i isulen ar ass-a. Deffer umgaru-a, zeddin-d Tuddsa n Yiɣlanen Yeddukklen i uḥraz n talwit d tɣellist deg umaḍal d usmal n unmireg gar tmura. Tiḍniwin i irebphen amgaru, Ccinwa, Fṛansa, Tadukli Tasuvyatit, Tagelda Yeddukklen d Yiwanaken Yeddukklen uɣalent d nitenti i d timaslaḍin timezgiyin n Useqqamu n Tɣellist n Yiɣlanen Yeddukklen (s uzref n uviṭu). Tadukli Tasuvyatit d Yiwanaken Yeddukklen uɣalent d timenzaɣin yernu yella-d gar-asent Umgaru Asemmaḍ. Ma d tiḍniwin timeqqranin n Tuṛuft uɣalent d tuḍɛifin ɣef lǧal n usnegzu i yekkan fell-asent deg Umgaru Anmaḍal Wis Sin. D aya i tent-yeǧǧan ur zemmrent ara ad kemmlent ad jemɛent tihras-nsent deg Tefriqt d Asya yernu terra-tent tmara ad asent-fken azarug. D aya umi semman "tukksa n usehres." Amur ameqqran seg tmura umi tedrem temguri deg umgaru-nni ulsent ṣkent-d timguriwin-nsent yernu smeɣrent-tent.



© Asegzawal n Tmaziɣt - Dictionnaire de tamazight - Tamazight Dictionary - قاموس الأمازيغية - Omar MOUFFOK