Arr

From Asegzawal n Tutlayt Tamaziɣt

Arr (irran), lion (fr) – lion (en) - أسد

Addad amaruz: warr (yirran).

Agdawal: izem (izmawen) [33].


Arr (Takussna):

Ula ma arr iṛeεεed yernu yewεeṛ, maca ittedder deg twacult yernu, s umata, ḥnin ɣef wayt twacult-nnes. Irran tteddren deg tegrawin ilan 15 niɣ ugar n yimaslaḍen.

Tagrawt n yirran ttilin deg-s gar 3 d 40 n yiɣersiwen. Deg tegrawt-a, irran gemmren, ssegmayen arraw-nsen, ttnaɣen ɣef wakal-nsen. Taktemt n warr isem-nnes tasedda. Deg tegrawt n yirran, d tiseddiwin i igemmren (chasser) ugar, yernu d nitenti i yessegmayen arraw-nsent. S umata, akk tiseddiwin yellan deg tegrawt ttemyilint: ta d tayemmat, ta d taxalet, ta d yelli-s, ta d jida-tsent, atg. Aṭas n tseddiwin i d-yettarwen ɣef tikkelt deg tegrawt. S waya, imeẓẓyanen zemren ad ṭṭḍen ama ɣer yemma-tsen, ama ɣer tseddiwin niḍen i asen-yettilin. Tagrawt yettili deg-s yiwen niɣ sin kan n yiwlayen yettilin d aytmaten.

Tiseddiwin ttɣimint tameddurt-nsent akk deg tegrawt. Ma d irran, ttɣimin gar sin d kuẓ n yiseggasen, sakkin, ya ad ǧǧen tagrawt, ya ad nnaɣen d yirran niḍen ara ten-yeẓẓεen yernu asen-yekksen tagrawt-nni. Mi ara d-yas warr amaynu ɣef yiɣef n tegrawt ternu ad yeẓẓeε win yellan uqbel-is, ineqq daɣ irran imeẓẓyanen ara d-yaf deg tegrawt-nni imi i yeɣs arraw n tegrawt ad ilin seg yidammen-nnes netta. Arr ilehhu-d, s umata, s uḥuddu n wakal n tegrawt. Mi ara tɣerreb tafukt, arr iṛeεεed s zzeεḍ akken ad d-yessken i yirran niḍen dakken tamnaḍt-nni ideg yella netta d tegrawt-nnes d akal-nnes. Aṛεad-nnes yezmer ad yaweḍ ɣer 8 n yikilumitren ɣef wanda yella. Daɣ, arraw n tegrawt yellan mebεid, mi ara d-slen i uṛεad-nni, ad ẓren anda tella tegrawt-nsen yernu ad d-qqlen ɣer-s.

S umata, tiseddiwin gemmrent deg yiḍ. Nnumment gemmrent deg tegrawin ideg llant snat niɣ kraḍt n tseddiwin. Ttemεawanent akken ad xatlent kra n uɣersiw, ad d-zzint fell-as, sakkin ad azzlent deffir-s. Ula ma tiseddiwin ttemεawanent, maca arma εerḍent acḥal d tikkelt i ssawaḍent ad d-nɣent kra n uɣersiw. Mi ara d-nɣent aɣersiw, d irran i d-yettasen ad ččeɣ d imezwura. Tiseddiwin ur ttettent ara arma ṛwan yirran. Mi fukent tseddiwin učči, ad d-asen yimeẓẓyanen ad ččen tisigar. Irran d tseddiwin ttnaɣen s lewεaṛa mgal yirran niḍen ara iεerḍen ad d-adfen ɣer tegrawt-nsen.

Imi irran meqqrit yernu jehden, ttwaḥesben seg tegrawt n yimucca imeqqranen akka am yiksilen, iɣilasen, imayasen, ijagwaṛen d yikugaṛen.


© Asegzawal n Tmaziɣt - Dictionnaire de tamazight - Tamazight Dictionary - قاموس الأمازيغية - Omar MOUFFOK