Tuddsa

From Asegzawal n Tutlayt Tamaziɣt

Tuddsa (tuddsiwin), [1] organisation (fr) – organization, organisation (en) - منظمة


Tuddsa n Yiɣlanen Yeddukklen (Takussna):

Iɣlanen Yeddukklen d tuddsa tagernabaḍt iswiyen-nnes d aḥraz n talwit d tɣellist deg umaḍal, asnegmu n wassaɣen n tammidwa gar yiɣlanen, aseḍru n unmireg agraɣlan d usgurmet n yirmuden d-yettilin gar yiɣlanen. D nettat i d tuddsa tagraɣlant tameqqrant akk deg umaḍal. Tasɣimt n Yiɣlanen Yeddukklen tusa-d deg temdint n New York (deg Yiwanaken Yeddukklen n Temrikt), d acu kan, tla daɣ tinariyin deg Geneve (Sswis), Nairobi (Kenya), Vienna (Tutrict) d La Haye (Timura n Wadda) anda i tella Tsenbert-nnes Tagraɣlant n Teɣdemt.

Tuddsa n Yiɣlanen Yeddukklen zeddin-tt-id deffer Umgaru Anmaḍal Wis Sin akken ur d-ttilin ara yimgura inmaḍalen niḍen, yernu texlef-d Tamɣunt n Yiɣlanen i yuɣalen d tasudut tarmellilt. Deg wass n 25 Yebrir 1945, 50 n yiɣlanen i yemlalen deg San Francisco (Iwanaken Yeddukklen) akken ad gen asarag yernu ad bdun tira n Tnattamt n Yiɣlanen Yeddukklen i smemmin ass n 25 Yunyu 1945. Tanattamt-a tebda tettwasnas ass n 24 Tubeṛ 1945 asmi i tebda Tuddsa n Yiɣlanen Yeddukklen timhal-nnes. Iswiyen n Yiɣlanen Yeddukklen, akken i d-ddan deg tnattamt-nnes d aḥraz n talwit d tɣellist, amesten n yizerfan n umdan, asgalu n tallalt tamdanant, asmal n usnegmu unzig d uḍman n usaḍuf agraɣlan. Mi d-tettwassersel, tella Tuddsa n Yiɣlanen Yeddukklen tla 51 n yiwanaken imaslaḍen. Deg 2023, tuddsa-a tla 193 n yimaslaḍen yernu aya yettgensis-d qrib akk iwanaken inayanen n umaḍal.

Ula ma tuɣdaḍt n Yiɣlanen Yeddukklen d aḥraz n talwit tanmaḍalt, aya yelfa-d yewɛeṛ deg temrawin timezwura n tmeddurt-nes ɣef lǧal n Umgaru Asemmaḍ d ccwal i yellan, deg tallit-nni, gar Yiwanaken Yeddukklen d Tdukli Tasuvyatit akked yimsisan-nsen. S waya, Iɣlanen Yeddukklen llan, s umata, ttaznen kan imanayen irumrigen akked yiɣallen imergen s yimrigen ifessasen akken ad ḍufen talwit deg temnaḍin ideg yella umgaru. Amḍan n yimaslaḍen n Tuddsa n Yiɣlanen Yeddukklen yerna s waṭas asmi i tennegma tukksa n usehres deg yiseggasen n 1960. Deg tallit-nni, 80 n tehras tiqburin i yewwin azarug, gar-asent 11 n yigelluyen yellan ddaw leɛnaya n Yiɣlanen Yeddukklen. Deg yiseggasen n 1970, amarud i d-ḥazen Yiɣlanen Yeddukklen i usnegmu yekka s waṭas amarud-nnes i uḥraz n talwit. Deffir ma ifuk Umgaru Asemmaḍ deg 1991, lhan-d Yiɣlanen Yeddukklen s wugar n tuɣdaḍin d yiniḍiyen imeẓḍa.

Tuddsa n Yiɣlanen Yeddukklen tla sḍiset (6) n tuddsiwin timehlanin: Agraw Amatu, Aseqqamu n Tɣellist, Aseqqamu Adamsan d Unmetti, Tasenbert Tagraɣlant n Teɣdemt, Tasnetla n Yiɣlanen Yeddukklen akked Useqqamu n Tmaḍirt (ula ma aseqqamu-a ulac d acu n yirmuden i itteg seg 1994). Anagraw n Yiɣlanen Yeddukklen llant deg-s mennaw n tneggiwin yemmuzzgen, isenduqen d wahilen gar-asen Tagrawt n Tbanka Tanmaḍalt, Tuddsa Tanmaḍalt n Tdawsa, Ahil Anučči Anmaḍal, UNESCO d UNICEF. Nnig waya, kra n tneggiwin n Yiɣlanen Yeddukklen am Useqqamu Adamsan d Unmetti ttcawaṛent kra n tuddsiwin tirnabaḍin deg umahil-nsent.

Amasay agejdan n Tuddsa n Yiɣlanen Yeddukklen d awnetlay amatu. Imir-a, awnetlay amatu n Yiɣlanen Yeddukklen d asertay d udiplumati apuṛtugali Antonio Gueterres. Mass Guterres yeṭṭef ansa-a tikkelt tamezwarut deg wass n 1 Yennayer 2017. Yules yettwafren ɣer-s deg 8 Yunyu 2021. Tuddsa-a tettawi-d idrimen-nnes seg tbezzar n yiwanaken imaslaḍen.

Tuddsa n Yiɣlanen Yeddukklen, imasayen d tneggiwin-nnes rebḥen-d mennaw n Warrazen n Nobel n Talwit ɣef lǧal n temlilin akked tmellilt n tigawin-nsen. Kra n yimanayen ttwalin dakken tuddsa-a d tadusi tameqqrant i talwit d usnegmu alsan, deg wakud ideg wiyaḍ ttwalin-tt d tarmellilt, d tameɣdist yernu d tameggafsut.



© Asegzawal n Tmaziɣt - Omar MOUFFOK